Театарската претстава „Каминот“ од Маргарит Минков, а во режија на Васил Михаил, е поканета да гостува на Меѓународниот театарски фестивал „Minat“ во градот Дениа, Шпанија, кој е со натпреварувачки карактер и се одржува од 1-ви до 10-ти јуни.
Екипата на народниот театар „Антон Панов“ Струмица претставата ќе ја изведе на 8 јуни.
Претставата беше премиерно изведена во мај 2013 година. Камерната дуо драма беше реализирана во актерски состав Коста Ангов – Хенри и Јасмина Вучкова – Ирис, додека во поново време улогата на Ирис ја толкува актерот и режисер Васил Михаил.
Овие неколку години освен на матичната сцена претставата доживеа и неколку фестивалски изведби и гостувања и тоа: Фестивал на бугарската драматургија „Друмев фест“ во Шумен – Бугарија, „Битфест“ во Битола – Македонија, Фестивал на камерен театар „Ристо Шишков“ Струмица – Македонија, „Национален фестивал на мали форми“ Враца – Бугарија, Македонски национален фестивал „Војдан Чернодрински“ Прилеп – Македонија, Анталија Градски фестивал – Анталија – Турција, Фестивал „Билазора“ Св.Николе – Македонија, како и гостувањата во Крањ – Словенија, Штипско лето, Демир капија, Гевгелија и секако претставите на матичната сцена во Струмица. Претставата досега доживеа 21 изведба.
