Општина Ѓорче Петров деновиве го реконструира повеќенаменското спортско игралиште во населбата „Даме Груев“. Истото е изградено само пред две години, поточно работите почнаа во јуни 2015 година, а завршија септември истата година.
Иако овој спортски храм е изграден по барање на граѓаните, истиот за кратко време беше руиниран. Искршени беа стативите и обрачите од кошевите, а посебна опасност претставуваше честото кршење на орманчето за струја.
По согледување на направените штети од корисниците на игралиштето, општината презеде акција за отстранување на истите.
Заменета е искината мрежа во должина од 160 м2 и е поставена двојна арматурна мрежа зад головите. Заменети се стативите со метални и поставени се и нови обрачи на кош-таблите.
Извршени се интервенции и на орманчето за струја со замена на склопките и истото е заштитено со метална мрежа.
Од Општината апелираат до граѓаните во иднина игралиштето за мал фудбал, кошарка и ракомет да се чува затоа што тоа е собиралиште на младите од овој дел на Ѓорче, но со намерно оштетување ќе им се ускрати можноста за спортување. Игралиштето има и рефлектори и може да се користи и во ноќните часови.
