Со своите успешни деловни потези што резултираа со денес супериорни компании од македонското бизнис портфолио, Кочо Анѓушев се истакна како одличен бизнисмен и претприемач. Неколку негови проекти што значително ја подобруваат сликата за македонската економија се велешки Брако – компанијата за која се врзува асоцијацијата – македонскиот феникс заради можеби единствената успешно изведена трансформација и приватизација.
По завршувањето на стечајната постапка и приватизацијата, започнува новата ера во работењето на оваа компанија. Денес, основната дејност на БРАКО е производството на жични производи, програма по која што е препознатлива на многу пазари, како на Балканот така и во Европа. Со достигнувањето на производството од 1400 тони на жични производи месечно, на почетокот од 2005 година, БРАКО, се наметна како сериозен лидер во производството на жични производи во државата и во регионот. Имајќи визија компанијата да прерасне во Балкански лидер во производството на жични производи, од почетокот на 2006 година БРАКО отвори свои производствени капацитети, погони на пристаништата на реката Дунав во Панчево, Србија – БРАКО – ФЕРОПРОДУКТ и во Видин, Република Бугарија – БРАКО – БУГАРИЈА. Со овие два значајни чекори компанијата прерасна во Холдинг компанија.
Од неодамна Брако ги прошири своите производни капацитети и почна да произведува камиони кои се извезуваат во САД, Кина, Англија, Германија, Белгија, Романија, Турција и Данска. Со договорот постигнат со Green Machine оваа македонска компанија има почетни нарачки од 200 висококвалитетни возила за градско чистење кои ќе се гледаат низ светските метрополи. Брако брои повеќе од 600 вработени.
Во 2014 година, на листата на „Форбс“ еден од петте најбогати Македонци беше и Кочо Анѓушев. Но, не во групата на најбогати, туку како бизнисмен кој во Македонија ги разбил табуата во деловното опкружување и ја вовел ерата на експанзијата на македонскиот капитал, според што е посочен како „остров сам за себе“. „Форбс“ тогаш пишуваше за него како за бизнисмен и факултетски професор, кој се споредува со спортистот Сергеј Бубка, ама во бизнисот на трговијата со струја.
И сосема оправдано, затоа што Анѓушев како одличен познавач на електроенергетскиот сектор на Република Македонија, трговијата и размената на електрична енергија ја основа ЕДС, водечка компанија за трговија со електрична енергија. Со портфолио од 320MW, ЕДС поседува најголема и најдобра балансна група и со тоа условите за снабдување со струја ги прави најповолни на македонскиот пазар. ЕДС е единствената македонска компанија што има развиена мрежа за снабдување со електрична енергија и меѓународно искуство во набавка на струја на слободен пазар. ЕДС е членка на меѓународната берза за набавка на струја.
И уште, Кочо Анѓушев е основач и Главен извршен директор на ФЕРОИНВЕСТ ДОО, денес модерна бизнис групација што ја сочинуваа компаниите БРАКО, АКВАВАТ, МАЛИ ХИДРО ЕЛЕКТРАНИ, ЕЗЕРО МХЕ, ДРУГОВО-СТУДЕНИЦА, ХИДРО ОСОГОВО и ENERGY MAINTENANCE SOLUTIONS.
Паралелно со успешното менаџирање со Групацијата Фероинвест, е и професор на Машинскиот Факултет во Скопје, при што одржува настава и е вклучен во повеќе научноистражувачки работи и има издадено повеќе од 100 научни трудови на меѓународни и домашни симпозиуми, а исто така има реализирано и повеќе од 50 проекти во индустријата, од областа на машинството и индустријата.
Коментари