Претседателот на Европската централна банка (ЕЦБ) Марио Драги соопшти дека се намалени ризиците кои се закануваа на јакнењето на економијата на еврозоната.
Меѓутоа, како што кажа, сеуште е рано да се прогласи победа и да се започне со укинување на стимулативните мерки.
Марио во обраќањето пред холандските пратеници изјави дека најновите податоци потврдуваат дека закрепнувањето „станува се поцврсто“ и дека ризиците се намалени.
„Сепак, прерано е да се прогласи успех“, изјави Драги и истакна дека подобрените прогнози на банката подразбираат полна примена на стимулативни мерки.
ЕЦБ ќе продолжи да откупува обврзници во вредност од 60 милијарди евра месечно до крајот на годината, а и подолго ако биде потребно.
Банката ја задржа референтната каматна стапка на нула проценти иако е забележан економски раст.
Стимулативната програма на ЕЦБ предизвика критики кај просперитетните земји на Европа, како што се Германија и Холандија.
Еврозоната во првиот квартал забележа раст од 0,5 проценти, а невработеноста опадна на 9,5 проценти, но со големи разлики меѓу земјите. Инфлацијата порасна на 1,9 проценти, што е во склад со целта на ЕЦБ.
