Интернационалниот фестивал на монодрама „Битола 2017“ почнува денес вечер, на кој годинава за наградата „Гран при“ учествуваат актери од повеќе земји, меѓу кои: Естонија, Хрватска, Русија, Холандија, Полска, Израел, Словенија, Германија и од Македонија.
Фестивалот ќе биде отворен со претставата „Брачна игра“ во која настапуваат актерите Игор Џамбазов и Весна Петрушевска, а ќе биде изведена во чест на учесниците кои од утре ќе го почнат натпреварот за наградата „Гран при“, како и наградата на публиката која се добива со директно гласање на гледачите.
Настапите на актерите ќе ги оценува меѓународно жири предводено од турскиот драматург и режисер Емре Ердем, холандската актерка и драмска писателка
Полет Смит, театрологот Нина Мазур од Украина, која живее и работи во Германија, и два члена од Македонија, Игор Џамбазов и Атила Клинче.
Интернационалниот фестивал на монодрама секоја година се одржува под покровителство на Министерството за култура.
