Никогаш не дошло во прашање Охрид да биде избришан од листата на УНЕСКО, изјави Ана Сидоренко, претставник на УНЕСКО по денешната посета на Завод и музеј Охрид.
“Нашата посета е рутинска за да ја провериме состојбата на објектите врз кои се врши конзервацијата, а се дел од културното наследство на сите компоненти и за тоа да го известиме комитетот на УНЕСКО, изјави Сидоренко.
Сидоренко објасни дека тука се за да го видат прогресот и напорите на локалните и националните власти во заштитата на културното наследство и спроведувањето на забелешките од УНЕСКО од минатата година на 40-та седница одржана во Истанбул. Сега, како што рече, само вршат надзор, а подоцна ќе имаат состаноци на кои ќе ги презентираат нивните препораки.
Таа појасни дека целта на посетата на Охрид е да се изврши увид не само на најавените проекти поврзани со националниот парк Галичица, туку и да се изврши мониторинг на целото културно и природно наследство и како тоа се заштитува, како и сите активности кои се преземаат.
Според работната агенда претставниците на УНЕСКО е предвидено да се сретнат и со градоначалникот на Охрид и со претставници на невладините организации чии активности се насочени кон заштита на природното богатство и културно наследство.
