Социјалното претприемништво во последните неколку години во голема мера придонесува за развојот на бруто домашниот производ во земјите од Европа. Социјалното претприемништво во Македонија е во зачеток и се јавува во повеќе првични форми (реинвестирање на профит, вработување на лица од ранливи групи, производство и достава на производи и услуги за ранливи општествени групи) , но е многу малку развиено поради тоа што ретко кој се осмелува да дејствува во оваа област. Причините се бројни од немање политичка и правна рамка која го регулира, преку непостоење на финансиски механизми за поддршка на социјалното претприемништво, до недостаток на понуда и побарувачка за социјално претприемништво.
Знаејќи го фактот дека подемот на социјалното претприемништво е глобален тренд кој го зафаќа полека но сигурно и нашиот регион клучно е да се истакне дека носечки двигател на социјалната економија се социјалните претприемачи. Развојот на социјалното претприемништво е мултипликативен бенефит за целото општество, со него се развива микростопанството, се генерираат нови вработувања, се активира социјално- загрозеното население, придонесува за намалување на сиромаштијата, освестување на населението.Оваа економија создава општествени вредности и добра како на пример поеднакво општество, социјално вклучување и порамномерно распределување на богатството уште се вика и добра економија. Удел во поддршката на развој на добра економија може да имаат и компаниите и корпоративниот сектор кои се водени од премисата да го максимираат профитот и оттаму се дијаметрално различни од социјалните претпријатија кои не максимираат профит, туку го користат профитот во општествени цели.
Центарот за истражување и креирање политики (ЦИКП), во Македонија е носител на активностите кои се спроведуваат во рамки на регионалниот проект Smart Start ко-финансиран од Европската Унија (кој се реализира во пет земји како што се Македонија, Босна и Херцеговина, Србија, Црна Гора и Турција). Во рамки на Smart Start во нашата земја дваесет невладини организации се подготвуваат да започнат со својата работа како социјални претпријатија. Проектот помина низ неколку фази, а следната фаза опфаќа поврзување на социјалните претпријатија со добро етаблираниот корпоративен сектор. ЦИКП е во потрага по домашни ‘’добри“ компании со волја за поддршка и развој на социјалното претприемништво.
Поврзувањето е од бенефит на социјалните претпријатија и на бизнисите. Бизнисите преку програмата за менторство ќе покажат дека се општествено одговорни, дека помагаат во развој на нови бизниси, дека несебично го споделуваат своето знаење и искуство и на тој начин влијаат позитивно на државната економија. Тие бизниси ќе добијат признание за Добар бренд. Придобивките се исклучително големи и важни за социјалните претпријатија кои од соработката со бизнис секторот ќе добијат непроценливо менторство и едукација.
Развојот на социјалното претприемништво во Македонија е неопходно да биде стратешки поддржан од корпоративниот сектор и да се интегрира во плановите на компаниите за економски и одржлив развој. За социјалните претпријатија е карактеристично тоа што иако користат претприемачки принципи, се стремат да и служат на заедницата. Добивката кај овие претпријатија се реинвестира за постигнување на конкретна општествена промена. Нудат иновативни приоди за одржлив и рамномерен развој, обезбедуваат добра и услуги за неразвиените заедници и вработуваат лица од ранливи групи.