Цените на мало во април годинава во однос на претходниот месец бележат пораст од 0,9 отсто, а трошоците на живот пораст за 1,3 отсто.
Според податоците на Државниот завод за статистика, порастот на трошоците на живот се резултат на повисоките индекси на зеленчукот за 31,1 отсто, овошјето за 4,6 отсто, цигарите за 3,5 отсто, јајцата за 1,8 отсто, свежото и киселото млеко и преработките од млеко за 0,7 отсто, преработките од овошје и алкохолните пијалоци за 0,3 отсто и месото и кондиторските производи за 0,2 отсто.
Во април, пораст на трошоците на живот е забележан и кај меѓуградскиот превоз на патници со автобус за 5 отсто, авионскиот превоз на патници за 4,6 отсто, ПТТ-услугите за 1,9 отсто, сообраќајните средства за 0,7 отсто, здравствените услуги за 0,5 отсто, услугите за лична хигиена за 0,4 отсто и останати услуги неспомнати на друго место за 0,3 отсто.
Намалување на индексот на трошоците на живот во април 2013 година, во споредба со претходниот месец, е забележано кај преработките од риба за 1,4 отсто, другите прехранбени производи за 0,3 отсто и преработките од месо за 0,2 отсто.
Намалување на индексите на трошоците на живот е забележано и кај течните горива и гасот за домаќинствата за 3,1 отсто, нафтените деривати за 2,8 отсто и мебелот и средствата за хигиена за 0,2 отсто.
Цените на мало во април 2013 година, во споредба со април 2012 година, бележат пораст од 0,9 отсто, а индексот на трошоците на живот бележи пораст од 3,3 отсто.
