Додека поранешната администрација на претседателот Барак Обама ја одбегнуваше, Месечината на новиот претседател Донал Трамп му стана многу посакувана дестинација, така што тој почна да го поттикнува приватниот сектор во кој гледа ветувачки потенцијал.
Иако Трамп малку за тоа отворено зборуваше, неговите соработници и поранешни вработени во НАСА кои го советуваат, велат дека постои интерес за враќање на Месечината во рамки на партнерствата со приватниот сектор.
Милијардерот Елон Маск(Space X) и Џеф Безос(Amazon) се сретнаа неколку пати со советниците на Трамп по изборите.
„Сигурно дека постои нов интерес за Месечината во администрацијата на Трамп“, рече Џон Логсдон, поранешен директор на Институтот за вселенска политика во Вашингтон.
Некои од советниците на новиот претседател работеле на програмата Constellation на поранешниот претседател Џорџ В. Буш, кој го предвиде враќањето на Месечината пред мисијата на Марс.
Но, Барак Обама, оценувајќи ја Constellation за прескапа, се откажа од таа мисија, појаснувајќи дека САД биле на Месечината и дека треба да се фокусираат на Марс.
Некои од луѓето вклучени во таа мисија сè уште се лути бидејќи сметаат оти одлуката за откажување била погрешна.
Други се надеваат на амбициозниот вселенски проект на Трамп, кој би го вклучувал јавното-приватно партнерство.
„Администрацијата на Трамп сака да направи нешто спектакуларно и храбро и Месечината сигурно е добра идеја“, рече Ерик Сталмер, претседател на Федерацијата на комерцијални вселенски летови.
