Излегувањето на Велика Британија од Европската унија ќе го намали растот на бруто домашниот производ на Шпанија за 0,2 до 0,4 процентни поени, покажуваат извештаите на Владата во Мадрид.
Економската активност на Шпанија, поради Брегзит, би можела да падне за две до четири милијарди евра годишно, што е еднакво на падот на БДП од меѓу 0,2 и 0,4 процентни поени, се наведува во извештајот кој шпанските власти го претставија во Брисел, пренесува Франс прес.
Приоритет на Шпанија во преговорите за Брегзит, како што се наведува, ќе биде да се зачува слободното движење на работниците меѓу двете земји.
„Слободното движење на луѓето, кое му овозможува на секој граѓанин од земјите членки на ЕУ да работи било каде во 28-члениот блок, претставува најрелевантен детал во преговорите за Брегзит“, се наведува во извештајот.
„Шпанската економија ќе претрпи негативни последици поради Брегзит, имајќи ги во предвид силните трговски и инвестициони врски на двете земји. Според најдоборото сценарио, во кое официјален Мадрид би постигнал билатерален трговски договор со Лондон после Брегзит, извозот на Шпанија во Британија би опаднал за 464 милиони евра годишно. Падот на извозот, сепак, би можел да достигне и милијарда евра годишно, при што најтешко ќе бидат погодени прехрамбениот и автомобилскиот сектор. Битанија, како што наведува АФП, е клучна дестинација за шпанските инвестиции во странство и за Шпанија е главен извор на странски посетители.
Во извештајот се наведува и дека 102.498 шпански државјани живеат во Британија, а 391.000 Британци во Шпанија, меѓу кои 105.000 се пензионери кои здравствениот систем на Шпанија го чинат околу 250 милиони евра годишно.
