Кредитната агенција Фич го потврди „ББ“ рејтингот на Македонија.
Како што наведуваат од таму, потврдата на позитивните сигнали се должат на добрата монетарна и солидната макроекономска политика која одржува долгогодишна стабилност на девизниот курс.
Владините финансии имаат малку подобри перформанси од просечните во “ББ” категоријата, но сепак, БДП по глава на жител е под просекот во категоријата “ББ” држави.
Согласно проекцијата на Фич, македонската економија лани забележала раст од 2,6% од БДП. За 2017 агенцијата смета дека Македонија ќе има раст од 3,4% благодарение на извозот и на инвестициите.
Генерално стопанствениците очекуваат подобрување на економските, но сепак предупредуваат дека економијата не закрепнува толку лесно.
Фич ја оценува фискалната позиција на Македонија како „над ББ рејтингот“, а јавниот долг како одржлив. Дефицитот на тековната сметка е адекватно финансиран од приливите на странските директни инвестиции.
Денарот е стабилен, како што посочуваат од Фич, благодарение на посветеноста на Народната банка за одржување на стабилноста. Банкарскиот сектор останува стабилен, добро капитализиран и ликвиден.
Како клучна забелешка на Агенцијата е дека најголемата закана за македонската економија е пролонгирањето на политичката криза, за која велат дека е тешко да се прогнозира кога ќе заврши. Сепак посочуваат дека фискалната и монетарната политика се поставени на здрави основи, поради што го потврдуваат кредитниот рејтинг.
