Грција не може дополнително да ги намали пензиите како што бара ММФ, вели министерката за труд Ефи Ахчиоглу.
Таа се огласи во пресрет на состанокот на министрите за финансии на еврозоната закажан за понеделник и нивните проценки за остварениот напредок на Атина и исполнувањето на условите од меѓународниот пакет помош.
„Не можеме да го прифатиме инсистирањето на ММФ за дополнително намалување на пензиите“, се наведува во писмото на Министерката Ахчиоглу.
Таа го отфрли тврдењето на ММФ дека старосната граница за пензионирање во Грција е прениска и дека пензиите се превисоки, наведувајќи дека статистичките податоци на кредиторите, според кои на пензиите отпаѓаат 11 проценти од бруто домашниот производ (БДП) во однос на просекот во еврозоната од 2,25 проценти, всушност се лажни, пренесува агенцијата Ројтерс.
„Инсистирањето на дополнително намалување на пензиите, додека грчките пензионери истовремено едвај имаат доволно за да преживеат, дефинитивно не претставува пат за решавање на проблемите со незадоволството на јавноста“, смета министерката.
Грција која беше зафатена со криза 11 пати ги намалуваше пензиите од 2010 година, кога со ЕУ и ММФ го потпиша првиот пакет помош за добивањето на помош. Повеќето грчки домаќинства зависат од 2,7 милионери пензионери со цел да состават крај со крај, покажуваат податоците од испитувањето на јавното мислење.
Официјалните претставници на еврозоната минатата недела соопштија дека кредиторите ќе побараат од Атина да ги усвои новите мерки за проширување на даночната основица и намалување на пензиите.
