Централната банка на Кина ги предупреди домашните берзи кои тргуваат со биткоинот дека ризикуваат да бидат затворени.
Тоа ќе се случи, се заканува Пекинг, доколку се утврдат кршења на прописите околу таа валута во земјата. Ова предупредување доаѓа во момент кога тамошните регулатори се обидуваат да го спречат одливот на капитал од земјата, но и стравот од понатамошното слабеење на јуанот.
На својата интернет страна, Народната банка на Кина советува да не се учествува во активностите кои можат да бидат карактеризирани како перење пари.
„Доколку се утврди такво кршење на прописите, сериозно ќе реагираме и инспекцијата ќе ја затвори таа берза“, соопшти банката.
Кинеските регулатори одржаа и состанок со трите најголеми берзи кои тргуваат со биткоинот со цел да ги потсетат на строгите прописи.
Побарувачката за виртуелни валути, особено биткоинот, е во пораст во Кина во последните неколку месеци, а тоа е резултат на недовербата во стабилноста на домашната валута. Во моментот, биткоинот вреди околу 1.060 долари.
