Секои три секунди некој руски државјанин купува преку „eBay“, во земјата која има најмногу интернет корисници во Европа.
Сбербанк предвидува дека до 2020 година Русија ќе стане најголемиот европски пазар и четврта во светот. Русите се релативно богати и сакаат да трошат, а имаат БДП по глава на жител сличен како западните развиени земји, а различен од ченовите на БРИК.
Економистите се повеќе се согласуваат дека најголемиот поттикнувач на руската економија во наредните години ќе биде токму приватното купување, а не големите залихи на нафта и гас кои ги поседува оваа земја. Меѓутоа, освен потрошувачката во физичките продавници, Русите се повеќе ги освојуваат и виртуелните продавници.
Статистиката на „eBay“ покажува дека секои три секунди некој Русин купува преку овој веб-сајт. Во текот на минатата година на „eBay“ Русите оставиле околу 400 милиони долари, а тоа е за дури 54 проценти повеќе од износот во 2011 година.
Растот во онлајн шопингот, но и на шопингот во Русија воопшто, доаѓа како последица на се поголемата и побогата средна класа во земјата, која масовно ги открива привилегиите на онлајн купувањето. Неодамна и американскиот „Amazon“ отвори канцеларија во Москва, за која вели дека секојдневно бележи зголемен број на клиенти.