Македонија е добитник на наградата за најорганизиран штанд на еден од најголемите и најпосетени интернационални саеми за туризам во светот во Истанбул, Турција.
Во конкуренција од повеќе од 80 држави и над 5.000 институции лоцирани во 12 хали, штандот на Македонија е прогласен за најорганизиран штанд за 2017 година на 21. по ред саем за туризам во Истанбул.
Саемот во Истанбул кој е еден од петте најголеми саеми за туризам во светот, беше посетен од 46.670 посетители во периодот од 26-29 јануари 2017 година, а присутни беа 450 тур-оператори од 55 земји.
Агенцијата за туризам на саемот во Истанбул ја презентираше природата, културата и отоманските споменици во Македонија, вклучувајќи ги и македонската традиција и туристичките посети на градовите.
Штандот на Македонија беше посетен од турскиот министер за култура и туризам, Наби Авци, како и Генералниот секретар на Светската туристичка организација, Талеб Рифаи кои искажаа задоволство од учеството на Македонија на саемот и ги потенцираа најзините природни убавини споделувајќи ги личните импресии.
На штандот на Република Македонија во Турција, ко-егзибитори беа македонските тур-оператори Бадемтур, Генерал Турист, Фибула, Балкантиме и Вардар Експрес, а штандот го посетија и Н.Е. Живко Муцунски, Амбасадор на Република Македонија во Турција, Синиша Иванковиќ, Конзул на Македонија во Турција, како и Економскиот промотор на Македонија во Турција, Филиз Вели.
Минатата, 2016 година, Македонија ја зема првата награда за пријателство на саемот за туризам ЕМИТТ во Истанбул, Турција.
