Приватната потрошувачка во САД во декември минатата година пораснала со најбрзото темпо за три месеци, што на најголемата светска економија и даде поттик при влезот во 2017 година.
Приватната потрошувачка пораснала за 0,5 проценти во декември, што е значително подобрување во однос на скромниот раст од 0,2 проценти од ноември и најдобриот податок откако потрошувачката скокна за 0,7 проценти во септември, според податоците на американското Министерство за трговија, пренесува агенцијата АП.
Приходите на граѓаните исто така остварија извесен напредок, благодарение на скокот од 0,3 проценти во декември.
Податоците за приватната потрошувачка се следат со внимание, бидејќи таа изнесува 70 проценти од економските активности на САД.
