Бизнис делегација на Стопанската комора на Македонија од 22. до 25-ти овој месец учествува на 8. Светски конгрес на коморите во Доха, Катар.
Како што соопшти Стопанската комора на Македонија, македонската делегација оствари средби со повеќе коморски и бизнис-делегации, со цел интензивирање на соработката, размена на искуства и реализација на заеднички проекти во иднина.
За време на тридневната манифестација, на 18 практични работилници се презентираа иновации и нови услуги, со цел да се зголеми експертизата и како да се подобри работењето на коморите.
На конгресот оваа година присуствуваат рекорден број од над 2.000 делегати. Коморските лидери и претставници на компаниите од повеќе од 120 земји дискутираат за најразлични прашања на повеќе пленарни сесии и работилници, за развивање и зајакнување на партнерствата, размена и споделување на најдобрите практики.
Настанот се одржува под покровителство на емирот Неговото Височество Шеикот Хамад бин Калифа Ал-Тани. Домаќин на Конгресот е Комората за трговија и индустрија на Катар.
Претседателот на Меѓународната трговска комора (ИЦЦ) Жерард Вормс, на отворањето на 8. Светски конгрес на коморите, повика на зближување и обединување на бизнис-заедницата од целиот свет, со цел да се направи поголем притисок врз владите за да се носат позитивни одлуки во текот на оваа година, а особено за време на министерскиот состанок на Светската трговска организација, што ќе се одржи во декември во Бали, Индонезија, како и на Самитот на Г20 во септември оваа година.
Говорејќи на отворањето на 8-миот Светски коморски конгрес, Вормс посочи дека со спроведувањето на договорите за олеснување на трговијата ќе се создадат повеќе од 120 милиони работни места во светот и ќе се намалат за половина трошоците поврзани со логистиката и бирократијата.
Тој додаде дека глобалната трговија не е во добра состојба во моментов, со оглед на тоа што има пад од 3 отсто, што претставува основен проблем со кој се соочуваат голем број земји во светот.