На Волстрит во понеделникот цените на акциите пораснаа, но пред крајот на тргувањето загубија дел од добивките по веста за бројните жртви во нападот со камион на божикниот саем во Берлин и убиството на рускиот амбасадор во Турција.
Индексот Dow Jones зајакна за 0,20 отсто, на 19.883 поени, како и индексот S&P 500 кој достигна 2.262 поени, додека Nasdaq индексот порасна за 0,37 отсто, на 5.457 индексни поени,
Во понеделникот беше продолжен подемот на цените на акциите, започнат на 8-ми ноември кога Донaлд Трамп беше избран за американски претседател, бидејќи вложувачите се надеваат дека неговите планови за намалување на даноците, зголемување на вложувањата во инфраструктурата и олабавувањето на регулаторните мерки во одделни сектори ќе го поттикнат растот на економијата.
Од претседателските избори, S&P 500 индексот порасна за речиси 6 отсто, додека Dow Jones индексот се приближи до психолошки важната граница од 20.000 поени.
„Подемот на Трамп и натаму е присутен. Секогаш која цените на акциите малку ќе паднат, вложувачите прискокнуваат и бараат добри можности за купување“, вели за Reuters Џејк Далархајд, директор во компанијата „Longbow Asset Management“ .
Растот на индексите од почетокот на седмицава во прв ред е благодарејќи на искачувањето на цените на акциите во технолошкиот сектор, за 0,6 отсто, при што цените на акциите на технолошките гиганти, како Apple, Amazon.com, Intel и Microsoft, поскапеа меѓу 0,6 и 2,1 отсто.
Меѓутоа, при крајот на тргувањето во понеделникот индексите загубија дел од добивките, откако беше објавено за нападите во Германија и Турција.
„Пазарот сака да биде сигурен дека тоа се изолирани случаи. Дали тоа ќе ја наруши економската активност само на тие подрачја или во пошироко подрачје и колку долго“, смета Џон Канали, стратег во компанијата „LPL Financial“.