Македонска делегација составена од тринаесет членови кои се преставници на локалните власти и експерти во енологија, до сабота, ќе престојува во францускиот регион Алзас во студиска посета посветена на винската индустрија.
Оваа посетата е поддржана од Програмата за развој на ОН (УНДП) за Македонија и има за цел да ги запознае македонските претставници со организацијата на винската индустрија, винскиот пат Алзас и нивната поврзаност со туризмот.
За време на посетата предвидени се серија средби со професионалци од винската индустрија.
Дел од посетата ќе биде посветен и на туристичката понуда во Алзас, на Агенцијата за развој на туризмот и Туристичкото биро на Оберне и економскиот развој (Агенцијата за развој на Алзас).
Средбите ќе треба да им помогнат на македонските експерти подобро да се запознаат со начинот на којшто е организирана оваа област во Алзас. За време на посетата ќе бидат посетени и Департманскиот совет на Горна Рајна, Советот на Европа и Европскиот суд за човекови права.
Домаќин на македонската делегација е асоцијацијата Алзас – Македонија (АЛМА), со која претседава Жак Шлеф.
