Струјата за широка потрошувачка во првиот квартал од оваа година, според податоците на Европската служба за статистика – Евростат, најевтина била во Бугарија, а најскапа во Данска.
Во Бугарија струјата се продава по просечна цена од 0,096 евра за киловат-час, додека Данците плаќале речиси тројно повеќе од Бугарите – по 0,309 евра за киловат-час.
Струјата во Бугарија е многу поевтина во однос на останатите земји на Балканскиот полуостров – Грците плаќаат по 0,177 евра за киловат-час, а Романците – 0,132 евра.
Меѓу оние кои кои скапо ја плаќаат струјата се Германците – 0,297 евра и Белгијците – 0,254 евра за киловат-час.
Според податоците на Евростат, цената на електричната енергија е намалена во 16 држави на ЕУ во периодот меѓу првото полугодие од 2015 и првото полугодие од 2016 година.
Најголемо намалување, за дури 20 проценти е забележано на Кипар, додека во исто време електричната енергија во Белгија поскапела за 20 проценти.
Просечната плата во Бугарија изнесува 480 евра, а во Данска повеќе од 4.800 евра.