Бразил драстично ги намали проценките за економскиот раст за оваа и следната година, поради потешкотиите за излез од најлошата рецесија во последните неколку децении.
Бруто домашниот производ (БДП) на Бразил, според новите проценки, ќе падне за 3,5 проценти во 2016 година, што е поголем пад од првично проектираните 3,0 проценти, пренесува агенцијата Франс прес.
Во 2017 година, бразилската економија би требало да се врати на патеката на растот од 1,0 проценти, што е поскромно во однос на првично прогнозираната експанзија од 1,6 проценти.
БДП на Бразил минатата година падна за 3,8 проценти, потсетува АФП.
