Филмскиот проект во развој “Сестра” беше претставен на копродукцискиот маркет Connecting Cottbus во Котбус, Германија и ја освои наградата coco Post Pitch Award, која подразбира постпродукциски услуги во вредност од 25.000 евра.
Оваа награда ја доделува германската продукција The Post Republic, а за истата одлучуваше три члено жири составено од истакнати професионалци од филмската индустрија, и тоа: Alexander Bohr (ZDF / arte), Juliette Lepoutre (Still Moving) и Michael Reuter (The Post Republic).
Connecting Cottbus (coco) е ко-продукциски маркет, кој оваа година се одржуваше по 18ти пат, а секогаш за време на филмскиот фестивал во Котбус, и е наменет за проекти од југо-источна Европа. Оваа година за време на маркетот 10 проекти, меѓу кои и проектот “Сестра”, беа јавно презентирани пред еминентни филмски професионалци од Европа, како: продуценти од западно европски земји, особено од Германија, продажни агенти, дистрибутери, претставници на фондови и финансиери, со цел да обезбедат копродукциски средстава за реализација на филмовите.
“Сестра” е проект за долгометражен игран филм во продукција на “Лист Продукција”. Режисер на филмот е Дина Дума, која воедно е и косценарист заедно со Мартин Иванов, а продуцент е Марија Димитрова.
Младата режисерка Дина Дума досега има снимено два кратки филмови “Елена” и “Враќање” кои беа прикажани на многу бројни фестивали и имаат освоено повеќе награди, а филмот “Сестра” ќе биде нејзин прв долгометражен филм.
Пишувањето на сценариото за филмот “Сестра”е поддржано од Агенцијата за филм на Р. Македонија.
