Бројот на невработени лица во 19-те земји членки на еврозоната е намален во месец септември за 101,000 на 16,8 милиони, покажуваат официјалните податоци.
Статистичката агенција на Европската унија Еуростат наведе дека стапката на невработеност во септември останала непроменета во однос на претходниот месец и изнесувала 10 проценти.
Падот на бројот на невработени сепак е позитивен знак. Невработеноста во земјите од еврозоната опаѓа со бавно темпо во последните две години со огромни разлики меѓу одделни земји, од 4,1 проценти колку што изнесува невработеноста во Германија до 19,3 проценти во Шпанија и 23,2 проценти во Грција.
Земјите од еврозоната бележат умерено економско закрепнување поттикнато со растот на најголемата економија, Германија, и низата мерки за поттикнување на Европската централна банка. Економската активност во еврозоната пораснала за 0,3 проценти во третиот квартал.
