Документарниот филм „Прва Македонска Трансверзала“ во режија и продукција на Горан Вуќиќ и Кирил Шентевски ќе биде прикажан на 24-от Меѓународен фестивал на планински филм, кој се одржува од 12-ти до 16-ти октомври во Попрад, во Словачка.
Филмот кој пред домашната публика беше премиерно прикажан на шестото издание на ЕХО Фестивалот на планински филм во 2015 година во Скопје и доби Посебно признание, потоа беше дел од програмата „ЕХО патува“ и беше прикажан во повеќе градови низ Македонија.
На филмот му претстои успешна фестивалска есен, и ќе биде прикажан на Македонскиот филмски фестивал кој ќе се одржи од 22-ри до 23-ти октомври во Торонто, во ноември ќе учествува на Банско филм фест во Бугарија, а во декември ќе биде прикажан на 14-от Интернационален филмски фестивал Катманду во Непал.
Филмот ја прикажува планинарската транверзала која неодамна беше возобновена и се протега низ планинските масиви во западниот дел на Република Македонија.
Зад камерата на филмот стои Кирил Шентевски, монтажата е на Горан Вуќиќ. Филмот „Прва Македонска Транверзала“ е снимен како независна продукција.
