Првиот ден оваа скратена трговска седмица донесе скромен промет на Македонската берза од 7,6 милиони денари.
Најголем промет беше остварен со обврзницата за денационализација РМДЕН 15 вкупно 2.153.467,42 денари и истргувани вкупно 37.861 лотови по 92,50 отсто од номиналната вредност. Прометот со обврзниците го зголеми и уште една трансакција со обврзниците РМДЕН 13 со вредност од 571.857 денари.
Акцијата на Стопанска банка АД Скопје беше единствена акција со промет близу милион денари и пораст на вредноста од 1,53 отсто, поточно промет од 999 510 денари истргувани преку 17 трансакции и количина од 1.724 акции.
Најголем пад на вредноста од 2,55 отсто забележа акцијата на Македонија турист АД Скопје и денот го заврши со вредност од 3.402 денари. На спротивната страна на чело на листата на добитници се најде акцијата на Топлификација АД Скопје со значаен раст од 5,90 отсто и денот го заврши со вредност на акцијата од 1.030 денари.
Индексот МБИ-10 забележа раст од 0,36 отсто и достигна вредност од 1.977,51 индексни поени. Наспроти него индексот ОМБ остана непроменет.
