Индискиот бизнисмен Балвиндер Сахани плати 33 милиони дирхами, што е еднакво на 9 милиони долари (околу 8 милиони евра) за регистарска табличка, информира „Bloomberg“.
Сахани планира да ја користи табличката со ознаките „Dubai D5“ за еден од своите „Roll Royce“ автомобили.
„Колекционер сум на уникатни регистарски таблички и се гордеам дека ја добив табличката со бројот 5“, вели тој.
Бројот беше продаден за време на аукција во саботата. Сахани, кој е сопственик на компанија која се занимава со одржување на имот во Дубаи, поседува и друг краток број, купен во текот на изминатата година за 25 милиони дирхами (6.8 милиони долари) – „O9“.
Кратките броеви во Обединетите Арапски Емирати се симбол на богатство. Рекордот сепак е од 2008-ма година, кога локалниот бизнисмен Саеед Абдул Гафур Кури плати 52.2 милиони дирхами (14,2 милиони долари) за привилегијата да се вози во автомобил со регистарски број 1.