Довербата на потрошувачите во САД во септември порасна на највисокото ниво од Големата рецесија, според денес објавените податоци на истражувачката компанија Conference Board.
Индексот на довербата на потрошувачите во септември порасна на 104,1 поени од 101,8 поени во месец август, што значително ја надминува проекцијата на аналитичарите кои предвидуваа пад на индексот на 98 поени, пренесува агенцијата Франс прес.
„Потрошувачите се пооптимистични во поглед на среднорочните перспективи за вработување, но се неопределени во поглед на деловните услови и перспективата на приходите“, изјави директорката на „Conference Board“, Лин Франко.
Потрошувачите, како што додаде, продолжуваат актуелните услови да ги оценуваат како поволни и предвидуваат скромен раст во наредните месеци.
