Сопствениците на големи депозити во двете водечки банки на Кипар се очекува да претрпат загуби во износ од 8,3 милијарди евра во периодот на реализацијата на антикризниит план, изработен од Еврогрупата, соопшти Европската комисија.
Под големи депозити на островот се подразбираат суми од над сто илјади евра, кои се сметаат за неосигурани според европското законодавство.
Документот на Еврогрупата за Кипар бил со датум од 12 април и ознака „конечна варијанта“. Во него се нагласува дека финансиските потреби на Кипар за периодот 2013-2016 година изнесуваат 23 милијарди ерва, од кои 13 милијарди земјата е должна да ги обезбеди од внатрешни извори, а 8,3 милијарди евра ќе дојдат од големите неосигурани депозити во двете банки – Народната банка и Банката на Кипар.
Меѓународната рејтинг агенција Мудис вчера предупреди дека на Кипар му се заканува банкрот и напуштање на еврозоната, независно од договорот со Еврогрупата за доставување помош од десет милијарди евра во замена за преструктуирање на двете главни банки и воведување антикризни мерки.
