Централната банка на Ирска ја намали проценката за економскиот раст на земјата за оваа и наредната година поради одлуката на Велика Британија да излезе од Европската унија.
Оттаму наведуваат дека полниот ефект од Брегзит ќе зависи од деталите за идниот договор на Лондон и Брисел.
Централната банка проекцијата за раст на бруто домашниот производ (БДП) Ирска за оваа година се намали на 4,9 проценти од претходно прогнозираните 5,1 проценти, а за наредната година на 3,6 проценти од претходните 4,2 проценти, пренесува агенција Франс прес.
„Блиските односи на ирската и британката економија се причина за поголемата изложеност на ирската економија на Брегзит. Економското влијание на Брегзит на Ирска, краткорочно и долгорочно гледано, би требало да биде негативнo и значително“, се наведува во кварталниот билтен на ирскатa централна банка, прв по одлуката на Британија да ја напушти ЕУ.
Банката, исто така предупреди на „можен подолг период на зголемена неизвесност и ризик“ во текот на траењето на преговорите меѓу Британија и ЕУ.
„Tрговските перспективи веројатно ќе бидат најтешко погодени од Брегзит, со оглeд на изгледите за слаба побарувачка и зголемена неизвесност“, се додава во билтенот.
Растот на извозот, според проекциите на банката, ќе изнесува 6,4 проценти во оваа, за во 2017 година да забави на 4,5 проценти.
Британија е најголемиот трговски партнер на Ирска во неколку клучни сектори, меѓу кои е и земјоделството. Во Британија одат околу 52 проценти од ирското говедско месо, 60 проценти од кашкавалите и 84 проценти од извозната живина.
Речиси 200.000 лица во Ирска живеат од извозот на своите производи во Британија, наведува АФП.