Инвестициите во американски компании од страна на странци достигнаа рекордно ниво во 2015-та година, а многу од трансакциите се поврзани со т.н. корпоративни преместувања, при што дел од американските фирми ги преместуваат седиштата во земји како Ирска, за да имаат корист од пониските даночни стапки, пишува „MarketWatch“.
Директните инвестиции во САД од страна на странските инвеститори растат за 68% до 420,7 милијарди долари во 2015-та година, што го надминува последниот рекорд од пред 15 години, покажува статистиката.
Околу 97% од инвестициите се поврзани со спојувања и превземања на американски компании. Само мал дел од инвестираните средства се за лансирање на нов бизнис или проширување на постојните странски операции во САД.
Речиси 42% од инвестициите во 2015-та година ги извршиле странски компании со седиште во Ирска, земја со многу пониска стапка на корпоративниот данок. Уште еден голем дел од вложените средства доаѓаат и од Канада и Германија.
Околу две третини од странските инвестиции се насочени кон бизнисот со фармацевтски лекови и медицината воопшто, а Калифорнија привлекува повеќе од една четвртина од странските средства во 2015-та година.