Европската унија проценува дека одлуката на Велика Британија да излезе од ЕУ би можела да доведе до намалување од 2,5 проценти на британскиот БДП следната година.
Европскиот комесар за економија и финансии Пјер Московиси изјави дека според прелиминарната проценка на трошоците на Брегзит, неизвесноста поврзана со одлуката на референдумот на 23-ти јуни би можела да го намали британскиот БДП меѓу еден и 2,5 проценти.
Московиси изјави дека БДП на останатите 27 членки би можел да биде намален меѓу 0,2 и 0,5 проценти.
Тој изјави дека тоа не се официјални проценки, како и дека намалувањето на БДП би можело да биде помало ако се намали неизвесноста и се даде соодветниот политички одговор.
Министрите за финансии на еврозоната денес на состанокот во Брисел ги разгледаа финансиските последици по одлуката на Велика Бритаија да отстапи од ЕУ и ги повикаа властите во Лондон брзо да реагираат во решавањето на проблемите по Брегзит.
