Гувернерот на италијанската централна банка Игнацио Виско изјави денес дека не ја отфрла можноста од државни интервенции во случај државните банки да потклекнат.
Во Италија, имено, расте загриженоста дека банкарскиот сектор, кој е оптеретен со ненаплатливи кредити во износ од 360 милијарди евра, би можел да предизвика појава на банкарска криза.
„Со оглед на ризикот според кој, во контекст на зголемената неизвесност, ограничените проблеми би можеле да ја поткопаат довербата во банкарскиот систем, можноста за државна интервенција не може да биде отфрлена“, изјави Виско во обраќањето кон италијанската банкарска асоцијација, пренесува агенцијата Франс прес.
Истовремено, италијанскиот министер за финансии Пјер Карло Падоан се обиде да ги смири заплашените акционери, порачувајќи им дека Италија продолжува да ги истражува сите можни начини со цел да дозволи државна интервенција која е во склад со прописите за државни субвенции, а се со цел заштита на штедачите.