Словенечкиот извоз на стока скокна во месец мај оваа година за 7,1 проценти на 2,1 милијарди евра, додека увозот порасна за 7,3 проценти, на 2,03 милијарди.
Тоа го покажаа прелиминарните податоци кои ги објави Заводот за статистика на Словенија.
Покриеноста на увозот со извозот изнесува 103,6 проценти, пренесува словенечката агенција СТА.
Државите членки на ЕУ учествуваат во словенечкиот извоз со речиси 78 проценти, а во увозот со 83 проценти, покажуваат статистичките податоци.
Германија и Италија се главни трговски партнери од ЕУ во извештајниот период, а најголем увоз од земјите надвор од ЕУ е остварен од Кина, додека Србија била главен извозен пазар за словенечката стока надвор од ЕУ.
Во првите пет месеци од 2016 година, извозот изнесувал 10,27 милијарди евра, што е за 4,9 проценти повеќе отколку во истиот период минатата година, а увозот пораснал за 1,5 проценти на 9,76 милијарди евра, што дава трговски суфицит од 512 милиони евра, наведува словенечката новинска агенција.