„Audi“ го стартуваше производството на новиот мал кросовер кој светска премиера имаше на саемот за автомобили во Женева, во март 2016-та.
„Audi Q2“ ќе се изработува во главната фабрика на германскиот производител, во Инглоштат. Станува збор за најголемиот погон на „Audi“ и втората по големина фабрика за автомобили во Европа од која годишно од производната лента се симнуваат преку 500.000 aвтомобили – по едно ново „Audi“ на секои 30 секунди.
„Q2“ е долг 4,19 метри, широк е 1,79, а висок е 1,51 метри, додека меѓуосовинското растојание изнесува 2,6 метри, што го сместува во класата на поткомпактни кросовери. Купувачите ќе можат да изберат меѓу шест погонски единици, во распон од 116 ks дo 190 ks.
Основниот модел ќе добие моќ од трицилиндарскиот 1.0-литарски „TFSI“ мотор, а покрај него во понудата ќе бидат и два четирицилиндарски турбо бензинци со зафатнина од 1.4 и 2.0 литри. Дизел понудата се состои од 1.6 литарски „TDI“ и две верзии на 2.0 литарски „TDI“ мотори.
Моќта стандардно се пренесува на предните тркала (освен кај 2.0 литарскиот „TFSI“ и 2.0 литарскиот „TDI“, верзии кои имаат „quattro“ погон) со помош на шестбрзинскиот мануелен менувач, додека како опција е понуден и седумстепен „S tronic“ со двојно квачило.