Словачка од петок за првпат во својата историја го презема шестмесечното претседавање со Европската унија (ЕУ), откако во 2004-та година стана полноправна членка на Унијата.
Според словачкиот премиер Роберт Фицо, за време на претседавањето на Словачка Унијата ќе треба да ги „редефинира“ своите неуспешни политики, како што е на пример онаа со миграцијата. На словачката агенда за време на шестмесечното претседавање, исто така, се и реформирањето на единствениот европски пазар и соочувањето со последиците од најавеното излегување Велика Британија од ЕУ.
„Важните одлуки за иднината на Европа не можат да бидат дефинирани од страна на одлуките на една или две земји членки, или пак од страна на земјите основачи на Унијата“, рече Фицо по средбата со претседателот на Европската комисија (ЕК), Жан-Клод Јункер, во пресрет на преземањето на претседателството од досегашниот претседавач Холандија.
