Доколку Велика Британија не дозволи неограничен пристап до својот пазар за труд за граѓаните на ЕУ, таа веројатно нема да има целосен пристап до пазарот на ЕУ, изјави ирскиот министер за финансии Мајкл Нунан.
Британскиот политичар и поддржувач на Брегзит, Борис Џонсон изјави дека Британија би можела да обезбеди полн пристап до пазарот на Унијата без потпишување на стандардот за слободно движење на работниците по заминувањето од тој блок, а врз основа на исходот од референдумот одржан минатата недела.
„Таа опција не е отворена, но гледам зошто Џонсон го изјавил тоа, иако ставовите се контрадикторни, тој на тоа всушност ја заснова кампањата“, изјави Нунан пред новинарите на конференцијата во Даблин.
Нунан објасни дека преседан е направен со Норвешка, кога оваа земја доби слободен пристап до пазарот, но Осло мораше да ги плати придонесите кои државите и ги плаќаат на Унијата и исто така мораше да обезбеди слободен пристап до својот пазар за труд.