Меѓувладина работна група одобрила 66 руско-кинески проекти со вкупна вредност од околу 90 милијарди долари, соопшти руската новинска агенција ТАСС. Комисијата се состана во Пекинг во пресрет на посетата на рускиот претседател Владимир Путин на Кина.
Заменик-министерот за економски развој на Русија Станислав Воскресенски рече дека на средбата биле разгледани инвестиции за воспоставување на безбедноста на храната во азиско-пацифичкиот регион. Во оваа врска се дискутирани можности за извоз на руско месо за Кина.
Од ТАСС потсетуваат дека во почетокот на јуни рускиот министер за земјоделство Александар Ткачов коментираше дека очекува во блиско време кинескиот пазар да се отвори за испораките на руски месни производи. Веќе има и руски производители, кои велат дека се заинтересирани за извоз на производството во Кина.
Еден од стратешките проекти, чиј старт се очекува да биде даден за време на посетата на Путин во Кина, е терминал за жито на границата на двете земји. Вредноста на терминалот е 1,1 милијарди долари, дополни заменик-министерот за земјоделство, Сергеј Левин.
Кинеската „COFCO“ веќе изјави за својот интерес да купува руски житни култури и снабдувањето ќе може да се реализира преку овој терминал. Очекувањата се дека Кина ќе може да добива по 2-3 милиони тони житни култури годишно.
Терминалот може да се користи за снабдување и кон други азиски земји, посочи уште Левин.
Официјалната посета на Владимир Путин во Кина започнува на 25-ти јуни.
