Во рамките на ЕУ се разгледуваат три можни сценарија доколку граѓаните на Велика Британија на претстојниот референдум се одлучат за излез од Унијата.
Министерот за надворешни работи на Шпанија, Хосе Мануел Гарсија Маргалјо, во пресрет на Советот на министри во Луксембург истакна дека најверојатното сценарио подразбира воспоставување на режимот за слободна трговија по пример на Сеопфатниот економски и трговски договор меѓу ЕУ и Канада, со укинување на царината и ограничувањата за 99 проценти на производите кои се предмет на трговија.
Шпанскиот шеф на дипломатијата, како една од можните варијанти, наведе и вклучување на Велика Британија во Европскиот економски простор заедно со Лихтенштајн, Норвешка и Исланд.
Третото сценарио подразбира можност за воспоставување на режим на Европскиот економски простор без оглед на уплатувањето на средства во буџетот на ЕУ, каков што Швајцарија има со Унијата.