На Волстрит цените на акциите во понеделникот паднаа трет ден по ред, бидејќи вложувачите се несигурни пред седницата на американската централна банка Federal Reserve (Fed) и референдумот за излегување или останување на Велика Британија во Европската унија.
Индексот Dow Jones ослабе за 0,74 отсто, на 17.732 поени, додека индексот S&P 500 се лизна за 0,81 проценти, 2.079 поени, а Nasdaq индексот падна за 0,94 отсто, на 4.848 индексни поени.
Цените на акциите паднаа во сите десет сектори од S&P 500 индексот , а најмногу во рударскиот и во технолошкиот.
Падот на рударскиот сектор е последица на топењето на цените на нафтата и сировините, откако минатата седмица силно пораснаа.
Во технолошкиот сектор, пак, значително падна цената на акцијата на „Microsoft“, за 2,6 отсто, откако американскиот софтверски гигант објави дека за повеќе од 26 милијарди долари ја купува социјалната мрежа за професии LinkedIn, чијашто цена, пак, скокна за 46 отсто.
Претпазливоста на пазарите е последица од нервозата на вложувачите пред седницата на челниците на Fed во вторник и во среда. Иако не се очекува зголемување на каматните стапки уште сега, инвеститорите внимателно ќе следат дали банката ќе навести кога тоа може да се случи.
Вложувачите се претпазливи и поради тоа што се ближи референдумот за можното излегување на Велика Британија од Европската унија, а анкетите покажуваат дека исходот од референдумот е неизвесен.
Со слаби изгледи за раст, загриженоста дека Brexit ќе ја врати Европа во рецесија на врвот од листата е загриженоста на инвеститорите, која вклучува и негативни каматни стапки и опасните економски нерамнотежи во Кина. Затоа европските акции во понеделникот паднаа речиси за 1,9 отсто, додека азиските берзи забележаа најголем пад во последните четири месеци.
