Во рамки на третиот работен ден на Конференцијата, г. Антонио Барзашки од Народната банка на Бугарија ги елаборираше клучните аспекти на супервизијата на небанкарските обезбедувачи на платежни услуги, по што следеше вториот дел од презентацијата на г. Карло Виндер од Централната банка на Холандија за надгледувањето на платните системи, во којашто тој опфати повеќе практични прашања и организациски аспекти поврзани со процесот на надгледување на платните системи.
Презентацијата на г. Михаил ван Дуверен од Централната банка на Холандија и г. Руи Пиментел од Централната банка на Португалија беше посветена на плаќањата коишто ги врши државата во Холандија и во Португалија, при што беше разгледана улогата на централните банки како агенти на државата, со детален осврт на начинот на организација и функционирањето на системот на плаќања на државата во овие две земји.
Во рамки на овој ден, презентации имаа и претставници од Народната банка на Полска и од Народната банка на Република Македонија, и тоа г. Микал Попиолек, којшто го презентираше системот на надгледување на платните системи во Полска и г. Горан Јанкоски и г. Зоран Георгиев, коишто обработија тема поврзана со отпорноста на сајбер-напади.
Конференцијата беше затворена со сумирање на заклучоците и доделување на сертификати на учесниците.
