Основното училиште „Луиѓ Гуракуќи“ во Желино, денес доби нова спортска сала.
На свеченото пуштање во употреба на спортскиот објект, присуствуваа претседател на ДУИ Али Ахмети и министерот за образование и наука Пиштар Лутфиу. Во оваа пригода Лутфиу истакна дека продолжува проектот на Владата на Република Македонија и на Министерството за образование и наука за изградба на 145 училишни спортски сали во повеќе училишта во земјата.
„Ние денес исполнуваме една голема желба и потреба на учениците од оваа училиште, и како министерство потврдуваме дека стоиме на страна на учениците и училиштата со цел да се создадат современи услови како што заслужуваат сите граѓаните на Република Македонија“, рече Лутфиу.
Новата спортска сала е со површина од 1300 метри квадратни, со трибина и опремена со реквизити за играње фудбал, одбојка, ракомет, кошарка и гимнастика.
„Во соработка со општина Желино, ветениот проект предводен од страна на градоначалникот Фатмир Изаири, успешно се реализира и со предвидената динамика“, рече Лутфиу.
Министерот потенцираше дека досега се изградени и опремени 55 училишни спортски сали, од кои 25 се во средните училишта, 30 во основните, вклучувајќи ја и спортската сала на основното училиште „Луиѓ Гуракуќи ” во Желино.
