Цените на нафтата паднаа денеска на меѓународните берзи под 48 американски долари, притиснати од силниот долар и неочекуваниот раст на резервите во САД.
На лондонската берза цената на барелот падна 1,29 американски долари, на 47,64 долари. Во среда ја достигна највисоката вредност ова година од 49,85 долари. Во Њујорк барелот се тргуваше по 1,06 долари пониска цена во однос на претходното затворање од 47,13 долари.
Нафтените пазари во последно време црпеа поддршка од намаленото снабдување од Канада и Нигерија.
Одвоено, Организацијата на земји извознички на нафта ОПЕК на својата интернет страница објави дека цената на барелот на референтната кошничка на нејзината нафта во среда изнесувала 44,88 долари, што значи дека останала речиси непроменета во однос на претходниот трговски ден.