Британскиот премиер Дејвид Камерон ќе биде домаќин во четврток во Лондон на лидерите од целиот свет, со цел покренување на меѓународна офанзива против корупцијата, по нешто повеќе од еден месец од откривањето на панамските документи за затајување на данок.
На самитот ќе се соберат претставници на четириесетина земји, посебно оние што силно ги потресува корупцијата, како авганистанскиот претседател Ашраф Гани или неговиот нигериски колега Мухамад Бухари.
Поканети се и американскиот државен секретар Џон Кери, главната директорка на ММФ Кристин Лагард, претседателот на Светска банка Џим Јонг Ким, како и претседателот на антикорупциската невладина организација Transparency International, Хосе Угаз.
Камерон се надева дека во Лондон ќе биде потпишана „првата светска декларација за корупција“.
Тој текст треба да ги мотивира потписниците „да работат заедно“, но и да „признаат дека корупцијата ги задушува напорите во борбата против сиромаштијата.
Москва изрази воздржаност во поглед на обврзувачкиот карактер на идниот договор.