„Porsche“ претстави нова модификација на „Cayenne“, која го добила името „Platinium Edition“. Слична варијанта имаше и кај верзијата на теренецот пред последниот дотерување кое се случи минатата година.
Визуелно „платинестиот“ „Cayenne“ се разликува од стандардниот модел по сјајните црни елементи на каросеријата, 20-инчни бандажи „RS Spyder“ и посебните прагови со името на новата модификација.
Во опремата на новата верзија влегуваат уште би-ксенон фарови со системот „Porsche Dynamic Light“, специјални ретровизори, тонирани задни стакла, асистент при паркирање, засилувач на воланот „Power Steering Plus“, спортски седишта со можност за 8 различни поставувања, кожа и алкантара во кабината, а исто така и мултимедијален комплекс „Porsche Communication Management“.
Сето ова е достапно за потрошувачите во Европа во верзијата со 3.0-литарски дизел турбо „V6“ мотор кој развива 262 КС. Цената на возилото е 74.352 евра.
Во САД ќе се нуди „платинест“ хибриден „Cayenne“, кој се потпира на комбинација на бензински „V6“ агрегат и електромотор, која развива 416 КС. Оваа опција ќе се појави подоцна на Стариот континент, а најверојатно ќе се продава по цена од 90.298 евра.