Во 29 нови катастарски општини оваа година ќе се врши бесплатно запишување на правата на сопственост.
„Ја користам оваа прилика да ги повикам сите граѓани и правни лица кои поседуваат имот во катастарските општини опфатени со програмата, да поднесат барање, односно пријава до одделението на катастарот каде што се наоѓа нивната недвижност и кон истата да ја приложат целокупната документација со која располагаат за да го докажат првото на сопственост (пресуди, договори, акти на државни органи, наследни решенија, поседовни листови и сл), по што катастарот ќе изврши бесплатно запишување на правата на сопственост“, рече директорот на Катастарот Славчо Трпески.
Тој додаде дека во Република Македонија има вкупно 4.047.000 катастарски парцели и заклучно со денес 9,9% од вкупниот број на парцели сѐ уште се со неутврдени права на сопственост.
Според него, стратешка цел на Агенцијата за катастар на недвижности е секоја катастарска парцела во Република Македонија да биде со утврдени права на сопственост.
