Корисниците на електрична енергија нема да можат да ги платат сметките за струја на наплатните пунктови на ЕВН Македонија и електронски, за време на велигденските празници, туку само во банките и во поштите, поради надградба на системот.
Со цел подобрување на квалитетот на услугите кон корисниците, ЕВН Македонија планира надградба и одржување на постоечкиот систем за наплата.
За оваа цел ќе се искористи пeриодот од 28 април 2016 година, (четврток), од 15.30 до 3 мај 2016 година, (вторник), до 7.30, кога фреквенцијата на наплатните пунктови на ЕВН Македонија е намалена поради претстојните велигденски и првомајски празници.
„Ги известуваме сите наши корисници, деловни партнери и надворешни соработници дека во овој период не ќе можат да ги користат електронските услуги на ЕВН, како електронското плаќање на сметките и сите други информации од центарот за односи со корисниците кои се поврзани со системот за наплата“, соопштија од ЕВН Македонија.
Плаќањето на сметките за потрошена електрична енергија како и досега ќе може да се изврши во сите банки и пошти.
На располагање останува телефонскиот броj за информации (0890 88888) во Центарот за односи со корисници каде што може да се пријават евентуални проблеми во снабдувањето со електрична енергија и барања поврзани со конкретни услуги на ЕВН.
На сите барања и прашања евидентирани во контакт центарот ќе биде одговорено во најбрз можен рок по воспоставување на новите софтверски решенија, додаваат од ЕВН Македонија.
