Последниот ден од трговската седмица мина со вкупен промет на Македонската берза од 3.855.610 денари и реализирана вкупно количество од 2.480 акции преку 32 трансакции.
Само акцијата на Алкалоид АД Скопје имаше промет над 1,5 милиони денари со истргувани 309 акции преку 8 трансакции по просечна цена од 5.000 денари.
Најголем добитник на денот беше акцијата на Топлификација АД Скопје со раст на вредноста од 5,67 отсто, истргувани 19 акции преку две трансакции. Зад неа ја следеа акциите на Комерцијална банка АД Скопје со раст од 0,92 проценти и Макпетрол АД Скопје со раст од 0,82 отсто.
Спротивно од нив најголем пад на вредноста од -1,08 отсто со просечна цена од 460 денари забележа акцијата на Гранит АД Скопје, а по неа следеа акциите на РЖ Техничка контрола АД Скопје со пад од -1,03 отсто и просечна вредност на акцијата од 385 денари и акцијата на НЛБ Тутунска банка АД Скопје со пад -0,67 проценти и просечна вредност на акцијата од 7.400 денари.
Обврзниците за денационализација денес комплетно изостанаа од дневната листа.
Индексот МБИ-10 денот го заврши со раст од 0,18 отсто и изнесуваше 1.751,60 индексни поени, додека пак индексот ОМБ остана непроменет.
