Увозот на брашно и пченица од Србија не е ограничен и се реализира скоро секој ден, а контролата на пратките е согласно обврската за доследна примена на европските стандарди.
Ова е ставот на Министерството за земјоделство, шумарство и водостопаство (МЗШВ) во врска со денешниот напис во српски „Блиц“ – „Македонија ги избегнува српските производи и со уредби го руши ЦЕФТА договорот”.
Весникот наведува дека „македонските власти воведуваат различни прописи со кои спречуваат увоз на брашно и пченица од Србија, кршејќи го притоа ЦЕФТА договорот“, како и дополнителни контроли за одредени производи (сол за човечка употреба) наспроти досегашните вообичаени проверки.
– За да се биде сигурен дека се почитуваат стандардите се прави контрола за веродостојност на податоци кои се дадени во документот што го следи прoизводот. Ова е вообичаена пракса, нагласуваат од МЗШВ.
Контролата се врши согласно Законoт за безбедност на храна и Правилникот за општи барања за безбедност на храна усогласен со барањата на ЕУ. Според Правилникот за општи барања за безбедност на храна се врши документарен и физички преглед. Во физичкиот преглед спаѓа и земање мостри за анализа кои се носат во Институт за јавно здравје во Куманово. Доколку странката е незадоволна, суперанализа се прави во Институтот за јавно здравје во Скопје или на Факултетот за ветеринарна медицина.
Според Министерството, во дел од количините српска пченица увезени во февруари годинава, суперанализите потврдиле зголемено присутсво на олово. Тие се прогласени како небезбедни за исхрана.
Вкупната количина, пак, во која се пронајдени токсични материи е 536 тони и 480 килограми.
Увозникот на ваква пченица, според законот, има три можности, да се врати пченицата во земјата извозник, да се уништи, или да се намени за друга употреба доколку ги исполнува условите за друга употреба.
Стопанската комора на Македонија, која исто така, се изјасни околу текстот во „Блиц“, ја подржува работата на сите надлежни институции и нивните активности во насока на контрола на безбедноста на увезените производи единствено во согласност со пропишаните закони и правилници.
– Домашниот пазар останува отворен за фер конкуренција, почитувајќи ги прописите за здрава и пред се безбедна храна со цел заштита на крајниот потрошувач, велат од Комората.
„Блиц“ пишува дека „праксата на Владата во Скопје е да го бојкотира увозот на пченицата и брашното, се додека српските власти не се пожалат во ЦЕФТА, по што е неопходно да поминат два до три месеца додека ова прашање не го разгледа Заедничкиот комитет кога и се укинуваат бариерите“.
Според српскиот министер за трговија Расим Љајиќ, неговата Влада веќе упатила писмо до македонската со надеж дека проблемот ќе се реши на билатерално ниво.
– Ако на овој начин не успееме да ги надминеме недоразбирањата, не ни останува ништо друго освен да се обратиме во ЦЕФТА, вели Љајиќ за „Блиц“.
„Жито Војводина“, бизнис заедница на најголемите преработувачи во Србија, оценува дека „ваквите потези на македонската Влада ги чинат млиновите околу 600.000 евра месечно“.
