Четирите најголеми светски мултилатерални организации ги здружија силите со цел да им помогнат на земјите во развој да се изборат со проблемите кои ги имаат со затајувањето на даноците, пренесува „Reuters“.
Меѓународниот монетарен фонд, Светската банка, Обединетите нации и Организацијата за економска соработка и развој (OECD), најавија заедничка платформа во областа на даночните прашања, првиот чекор за креирање и примена на меѓународните стандарди.
Нивното соопштение доаѓа во моментот кога целиот свет е потресен од аферата „Панамските документи“, преку која во јавноста се појавија 11,5 милиони доверливи документи кои содржат детални информации за 214.000 офшор компании, на чие чело се некои од водечките светски политичари.
„Овие напори доаѓаат во моменти кога има голема динамика во областат на меѓународните даночни прашања. Јакнењето на даночните системи, политиките и администацијата, „испливаа“ како клучни развојни приоритети“, се наведува во заедничкото соопштение на четирите институции.
Првата задача на оваа иницијатива ќе биде на земјите во развој да им се испорачат „алатки“ со цел да им се помогне во борбата против корупцијата.
Буџетските каси на државите во развој, според податоците на ОН, се намалени за повеќе милијарди долари годишно поради т.н. „агресивното даночно планирање“ на мултинационалните компании.
