Предвремените парламентарни избори закажани за 5 јуни ќе чинат 456.664 милиони денари или околу 7,5 милиони евра, пишува во финансискиот план кој Државната изборна комисија го усвои вчера.
Од оваа сума само за печатење на избирачките ливчиња и друг печатен материјал се планирани 40 милиони денари. За печати, перничиња, УВ ламби и спреј, сигурносни ленти и паравани буџетот изнесува 9,2 милиони денари, за транспорт 9 милиони денари, за печатење на избирачки список изнесува четири милиони денари, за транспорт на членови на избирачки одбори во ДКП за денот на гласањето изнесува 25 милиони денари, транспорт на доверлив и недоверлив материјал седум милиони денари…
Членовите на ДИК не го прифатија избирачкиот список од Министерството за внатрешни работи, потпишан само од дополнителниот заменик-министер Митко Чавков, затоа што не бил во потребниот формат за да може да се споредат податоците. МВР ќе треба дополнително да достави список во бараниот формат. Членовите на ДИК не го отворија прашањето за тоа што податоците од МВР не се верификувани и од министерот Оливер Спасовски.
На седницата не присуствуваа Виолета Дума и Игор Милев, членови на ДИК предложени од СДСМ. Тие не присуствуваат на седниците затоа што сметаат дека не е извршено вистинско прочистување на избирачкиот список.
